Hummer og kanari

- ein operagalla med OperaKysten og Førde Kammerkor

Førde 29. Januar, Sogndal 31. Januar, Florø 1. Februar 2025

Plakat designet av **Endre Barstad** hos Altkanendres AS

Hummer og Kanari - litt av alt!

I år har OperaKysten sett saman eit program som lever opp til det gamle uttrykket; Denne kvelden var einaste fellesnemnar for programmet at vi serverte fantastisk opera av høg kvalitet og av dyktige utøvarar. Publikum fekk høyre musikk ifrå fleire ulike århundre, 11 ulike komponistar frå 6 ulike land, både i solistform, duettar og med kor. Nora Oleanne Sårheim hadde omsett alle tekstane til klingande nynorsk. Musikken kvilte i dei trygge hendene til Andreas Løken Taklo!

Med oss hadde vi mezzosopran Mari Askvik frå Leikanger, og vi gler oss til å høyre hennar flotte stemme fylle salane i Sunnfjord og Sogn. Vi er også svært glade for å ha fått med oss Førde Kammerkor på laget, etter det vellukka samarbeidet i 2023. Den gong var førdejenta Amanda Kvammen “berre” ein av sopranane i koret, men i år ønska vi ho velkommen også som gjestesolist i konsertane våre. Vår eigen kunstnariske leiar Nora Oleanne Sårheim vert sjølvsagt også å sjå i desse konsertane!

Artistane

Mezzosopran Mari Askvik

Sopran Nora Oleanne Sårheim

Sopran Amanda Kvammen

Klaver - Andreas Taklo

Førde kammerkor

Førde Kammerkor vart stifta i 1983 av organisten i Førde, Knut Tønsberg.
Gjennom åra har koret hatt fleire dirigentar. Oddleiv Mjøs var koret sin dirigent på slutten av 80-talet før Elizabeth Oltedal tok over i 1991. Ho var koret sin dirigent heilt fram til hausten 2008. Jorunn Bakke Nydal tok då over taktstokken i eit års tid.
Hausten 2010 vart kantor Asbjørn Flåm tilsett som dirigent, og har rolla som dirigent framleis.

Gjennom alle år har koret hatt eit variert repertoar - både sakralt og profant. Fast øvingstid har vore måndagskveldar kvar veke med avsluttande konsertar i kvart semester. I tillegg har ein arrangert korseminar i høve større prosjekt. Medlemmene av koret er rekrutterte frå Førde og andre distrikt i Sunnfjord Kommune.